BERBALAS PANTUN, BUKE PALANG PINTU

BERBALAS PANTUN

 BUKE PALANG PINTU

UPACARA PERKAWINAN MENURUT ADAT ISTIADAT MASYARAKAT BETAWI

SINOPSIS PEMBUKA :

Calon Pengantin Pria ( CPP ) diarak menuju rumah Calon Perngantin Wanita ( CPW ). Sang juru pantun berada di antara rombimgan dan mengambil posisi berdampingan dengan Ayah Calon Pengantin Pria. Setelah formasi ( barisan ) rombongan dirapihkan, rebane ketimpring ditabuh dengan melantunkan sholawat ( qasidah ) dan setelah berhenti melantunkan sholawat, kemudian terjadi dialog :

Ø  Juru pantun pihak CPP             :  “ Assalamu’alaikum”…

Ø  Juru pantun pihak CPW         : “ Wa’alikumsalaam Warahmatullohi Wabaraktuh”...

      Wah nih die kali rombongan nyang dari stadi kite tunggu-tungguin. . . ?. . .

Ø  Juru pantun pihak CPP             :    “nggak sale deh bang. . . biar pegimane, abang pasti lagi nungguin rombongan saye nyang dari (. . . . . . .)

Ø  Juru pantun pihak CPW         :    “Belon tentu juge bang . .  saye emang lagi nungguin rombongan, nah kalo saye sale trime tamu, saye diomelin ntar ame tuan rume ( sohibul hajat ) bang (. . . . . ) abang kudu tau . . .

“ bikin tape taro di keranjang. . . “ kasih ragi biar mateng. . .

“ nih siape abang. . . “ pagi-pagi bgini udeh pade dateng. . . .

Abang mao demo. . . ?”

Ø  Juru pantun CPP                       :    “ ehhh, jangan sembarangan ye. .  “ mase udeh pade ganteng-ganteng n cakep-cakep ( cantik-cantik ), abang bilang mao demo . . . kalo abang kepengen tau. . . .  baenye abang . . . 

“  jalan-jalan ke pasar kenari . .  “ beli duren pilih yang mateng . .

“ sengaje bang saye kemari. . . “ bawa tuan raje mude saye bang (......... ) nyang paling ganteng. . .

Ø  Juru pantun CPW                   :    “ Masya Alloh . . . “ Jadi ini nyang namenye bang (.........)

Ø  Juru pantun CPP                       :    “ Bener bang, emang abang kire siape . . . . . . ?

Ø  Juru pantun CPW                   :    “.... saye kire sultan Brunei Darussalam . . . .”

Ø  Juru pantun CPP                       :    “ Masya Alloh . . . . nggak sale bang, emang rade mirip ame sultan Brunei Darussalam . . .    

Ø  Juru pantun CPW                   :    “ alhmadulillah. . . . ati saye seneng banget, enya babenye mpo’ (...........) seneng apelagi tuan putri saye nyang ade di dalem . . .

Ø  Juru pantun CPP                       :    “ knape tuh bang . . .?

Ø  Juru pantun CPW                   :    “ kalo bise saye ungkapin perasaan tuan putri saye. .  laksane . .

“ kembang melati dicium kumbang. . “ kembang jambu jatoh ke pasir. . . “ ati mpo’(....................) seneng bukan kepalang. .  “ yang di tunggu-tungguin udeh dateng . . . .

Ø  Juru pantun CPP                       :    “ Alhamdulillah bang. . . kalo abang seneng . . . saye juge seneng. . . enya babenya bang ( ...................) juge seneng. . . kalo tadi abang bilang . . “ kembang jambu jatoh ke pasir . .” kembang kelapenye jatoh betumpuk . .” karna ni rombongan saye udeh hadir . .  “ kenape diri aje, nggak disuruh masuk . . nggak di suruh duduk ?”

Ø   Juru pantun CPW                  :    “ ohhh . . bgitu bang . . soal masuk sih gampang . . tapi abang ame rombongan tuan raje mude nggak bise masuk nyelonong bgitu aje . .  kan abang tau . .  “ kalo beli buah jangan yang busuk . . “ buah busuk banyak uletnye . . . “ kalo abang ame rombongan mao masuk ( duduk ) . . “ abang kudu siapain syarat-syaratnye . .

Ø   Juru pantun CPP                      :    “ syarat ape lagi bang . .? . . . . . buat bang (..................) kepale buat kaki, kaki buat kepale saye belain . . . ibarat “ bocah angon maen layangan . . “ buah nanas saye kupasin . .” perkare bang ( .......................) masuk ( duduk ) ade rintangan . . “ tugu monas masih sanggup saye pindain . . .

Ø   Juru pantun CPW                  :    “ wahhh. .sembarangan tugu monas mao dipindain. . . jangan tugu monas bang, ntar kite di omelin ame gubernur jakarte, bang ( .....................) . . kalo tadi saye perhatiin, . . .” abang pantun enak betul. . . “ kedengerannye cuman ampe di kuping . . .” kalo abang emang udeh siap betul . .  “ rubuin dulu palang pintu saye yang ade di samping . . .

Ø  Juru pantun CPP                       :    “ yahhh. . . jadi syaratnye cuman ngerubuin palang pintu abang . . . . yang pake baju (................... ) yang kaye anak ondel-ondel . . . ?

Ø  Juru pantun CPW                   :    “ sembarangan,. . .  palang pintu saye dikate kaye anak ondel-ondel. . . biar kate kaye anak ondel-ondel. . . palang pintu saye, saye import dari Thailand. . .

Ø   Juru pantun CPP                      :    “ dari Thailand. . .? kalo bgitu saye liat deh bang buke jurusnye. . . . !

Ø   Juru pantun CPW                  :    “ ni bang perhatiin . .

Ø   Juru pantun CPP                      :    “ apaan tuh bang barusan . . ?

Ø  Juru pantun CPW                   :    “ nih silat Betawi,  . . abang kire apaan ? . . .

Ø  Juru pantun CPP                       :    “  saye kire kebonye bang ( ................) yang kagak jadi dikorban kmaren. . . ehh bang . . “ buah jamblang rasenye sepet. . .” buah yang sepet baenya dibuang. . “tuh palang pintu abang keliatannye pucet . . “ mending suruh pulang sebelum saye tendang . . . .! . .

Ø  Juru pantun CPW                   :    “ sembarangan . . .bang,. ” buah jamblang emang rasenye sepet . . “ lantaran banyak semut rangrang . . “tampang palang pintu saye emang keliatannye pucet . . “ karne udeh tige bulan belon gamparin orang . .

Ø  Juru pantun CPP                       :    “ singkat kate singkat cerite . . “ di sono gardu di sini gardu. . “ kentong-kentongnye kayu cereme . . “ kalo emang tuh palang pintu abang mao diadu . . “ nyo’ kite tonton rame-rame. . .!

Ø  Juru pantun CPW                   :    “ ntar dulu bang, sabar. .  jadi abang nyang sewot ko’. . . abang mesti inget maenan kite masig kecil . . “ pok ama-ame nasi goreng campur mengkudu . . . “ nyo’ kite tepok tangan rame-rame jagoan kite, kite adu . . . .

Ø  Juru pantun CPP                       :    “ ayo . . .

Ø  Juru pantun CPW                   :    “ yahhh. . . saye ngaku kalah deh bang. . . tapi ntar dulu. .  palang pintu saye emang udeh abang rubuin . . .tapi abang ame rombongan kagak bise masuk ( duduk ) bgitu aje . . .

Ø  Juru pantun CPP                       :    “ kenape kagak bise masuk bang. . .?

Ø  Juru pantun CPW                   :    “ ade lagi bang syarat kedua nyang mesti abang penuhin . . !. . .

Ø  Juru pantun CPP                       :    “ syarat ape lagi nyang mesti saye penuhin, abang tinggal sebut aje deh. . . tuan raje mude saye pantang mundur . . . iye nggak bang (  ....................... )

Ø  Juru pantun CPW                   :    “ kan abang tau harge BBM ame sembako udeh pade naek . .” banyak nh warge udeh pade panik . .” kalo emang abang ame rombongana mao diterime secara baik . . “ tarikin dulu deh lagu sike yang paling asyik. . .

Ø  Juru pantin CPP                        :    “ jadi sayarat kedue cuman bawain lagu sike . .? . . jangan kuatir bang . . di kampungnye bang ( ....................) lagu sike gudangnye. . . jangankan lagu sike, lagu dangdut, gambus, keroncong masih sanggup bang ( ..................) bawain . . .

Ø  Juru pantun CPW                   :    “ lagu sike aje bang, . . nih enya babenye mpo’ ( ........................) mao dengerin lagu sike. . . 

Ø  Juru pantun CPP                       :    “  bae deh bang. .  .dengerin deh lagu sikenye. . . . .

Pegimane mane bang lagu sikenye. . . ? asyikkk nggak ? . . .

Ø  Juru pantun CPW                   :    “ Subhanalloh, . . syahdu banget bang lagu sikenye. . . ampe merinding saye . ..

Ø  Juru pantun CPP                       :    “ tuh baru encangnya bang ( ..........................) nyang bace. . kalo bang ( .......................) nyang bace, orang di sisni pade tidur semuenyee. . .

Ø  Juru pantun CPW                   :    “ emang kenape bang. . .?” . .

Ø  Juru pantun CPP                       :    “ bacenye dalem ati . . . . bgimane bang, palang pintu udeh rubuh. . . lagu sike udeh dibawain.  . . . kalo emang ade syarat lagi nyang kudu bang ( .....................) penuhin . . . abang tinggal sebut aje deh . .

Ø  Juru pantun CPW                   :    “ saye rase due syarat aje cukup deh bang . . saye liat kakinye bang ( ........................) udeh keliad-keliud, udeh kagak sabaran pengen ( ........................) ame mpo’ ( ...........................). . tap[I sebelum bang ( ......................) masuk ( duduk ) saye mao pesen ame bang ( .......................)  . . “ kalo dateng ke rumeh mertue pade malem jumat. . .” duduk sile sambil mengaji . . “karne abang ame rombongan dateng secara terhormat. . . “ masuk deh bang lewat pintu sebelah sini. . .  ! . .

Ø  Juru pantun CPP                       :    “ alhamdulillah, . .  bang ( ......................) kite udeh diizinin masuk ( duduk ) . . Assalamualaikum . . .

SINOPSIS PENUTUP :

Setelah dipersilahkan masuk, CPP dikalungkan ronce Melati oleh ibu dari CPW, dan rombongan CPP secara beriringan memasuki ruang akad nikah ( majlas akad nikah ) yang telah di persiapkan. Untuk selanjutnya dilaksanakan Upacara serah terima kedua Calon Pengantin dan acara prosesi Akad Nikah.

UNTUK LEBIH JELAS, ANDA BISA HUBUNGI SANGGAR SIRIH DARE DI 0217987134 ATAU  0818837872

FEBRUARI 2012

                                                                                                          SANGGAR SIRIH DARE